Luis Gómez daba voz a toda Arousa
Serxio González Souto
SERXIO GONZÁLEZ
AROUSA-VOZ DE GALICIA- 4 DE XULLO DO 2009
Foi o espíritu da primeira emisora de Vilagarcía nun tempo no que a vida se expresaba a través da radio
04 jul 2009 . Actualizado a las 02:00 h.
Chamábase La Voz de Arosa e funcionaba nun local ubicado xunta o colexio das Franciscanas, no que hoxe se coñece como praza da Independencia e antes levaba o nome do Mercado. Comezou a radiar soños, miserias, ledicia e esperanzas hai uns 50 anos, cunha voz que, dende aquela, foi xa a de Vilagarcía e a de toda Arousa: Luis Gómez, actor, xornalista, creador en definitiva, foi quen de encetar unha presa de programas que, cada día, mantiñan aos vilagarciáns pegados aos seus receptores.
El saco de la felicidad
, verdadeiro instrumento de acción social solidaria a través do que recadar axuda para as familias más necesitadas da bisbara; El batallón de las modistillas ; El tunante ; Discos dedicados, e tantos títulos míticos fóronlle dando forma ao medio que mellor expresaba o sentir e a vida cotiá da xente deste pequeno lugar nuns momentos sempre tan difíciles.
Marita, a súa filla, acompañou a Luis Gómez en moitas daquelas súas aventuras radiofónicas. A súa nai, Gari Lorenzo, coñeceu ao locutor grazas a unha paixón común, a zarzuela. E a arte correu xenerosa na súa ampla familia. Casada con Antonio, irmán de Pepe Domingo Castaño, dous dos seus fillos camiñan con paso firme no complexo universo da escena: Cristina Castaño, actriz, Nacho Castaño, actor e director de dobraxe. «Eran muy pequeños cuando él falleció, en 1992, pero estaría muy orgulloso de ver ahora a sus nietos», subliña Marita, que lembra aquel tempo, sobre todo os anos 60, como «una época preciosa en la que había distintos programas, hacíamos teatro leído, niños y mayores, y él estaba allí todo el día, lo dirigía y era el alma de todo aquello».
Capaz de convertir catro datos certeiros nunha verdadeira nova, Luis Gómez practicaba a primeira máxima do xornalismo: a boa información. Con ela desenvolveu pelexas radiofónicas de tanta magnitude coma a loita pola construción da ponte que hoxe comunica A Illa de Arousa co que as súas xentes denominan «o Continente». Pola súa creación bateuse u ata os seus últimos anos, cando La Voz de Arosa ía apagándose de vagar. «Fue una gran persona, tuvo diez hijos, muy buen padre, muy buen amigo de sus amigos, buen marido, un hombre que no pedía nada a cambio», lembra Marita. Se cadra levan razón quen pensan que as palabras as leva o vento. Pode ser. Mais en Vilagarcía sopran moitos refachos nos que a voz de Luis Gómez aínda se albisca.
Deixa unha resposta